Aiò, servici ! Perchè u cerbellu umanu ùn vole sente parlà di u cambiamentu climàticu

Hà dettu unu : durante seculi è seculi, noi altri umani avemu cridutu ciò ch'ùn esistia micca ed avale ricusemu di crede ciò chì esiste. 

Cumu serà ? Si pò parlà di cose fatàstiche, di murtulaghji, di mazzeri, di Paradisu, d'Infernu, d'ànghjuli, o puru d'eletti onesti o di u SCB in finale di l'Europa League... ma giremu u capu quandu si parla u riscaldamentu climàticu.

Perchè una tale cecàghjine vuluntaria quand'ellu s'agisce di què ? Perchè u cerbellu umanu sarebbe fattu cusì, ci dicenu i sapientoni : u cerbellu ùn vole sente parlà nè di u futuru nè di sacrifizi. In più, in quella storia di clima chì si sregula ùn avemu mancu un gattivu nemicu à l'usu Dark Vador, The joker o A Gloscia Maiò (Canioni ? Jean-Jean ?) à cumbatte.

Serà vera quessa ? Manc'appena.

U futuru hè digià quì : evenimenti climàtichi (fiumare, inalzamentu di l'acqua...) strani è stremi, disòrdine ecològicu (Xylella...) ci n'hè ogni ghjornu.

Sacrifiziu ? U sacrifiziu serà pocu : rinuncià à u cunsumerisimu sfrenatu ? À fruzà l'energia ? À fà ghjunghje porri è pomi da l'altra parte di u mondu ?

È u gattivissimu nemicu l'avemu di siguru : noi stessi ! Ah ah...

Aiò, servici !